تابعينا عبر الايميل

Related Posts Plugin for WordPress, Blogger...

الأربعاء، 2 مايو 2012

طريقه عمل كفته الحاتي بالفرن

بسم الله نبدأ

اول سر هو ان كمية الدهن في الكفته تبقى مش اقل من 30 % من اللحمه الحمرا ويكون دهن ضاني
ودا اللي هيدي الطعم الجميل لكفتة المحلات ..
يعني لو هنعمل كيلو لحمه نحط عليه مش اقل من 300 جرام دهن ضاني
والمحلات بقى بتضيف كمية الدهن نص كمية اللحمه . يعني بيوصل لنص كيلو دهن على كيلو اللحمه الحمرا
واوقات بيستخدموا خليط دهن ضاني مع (دهن بتلو او سنم جمل)

ندخل على المقادير والطريقه :

مقاديرنا النهارده تكفي من فردين لثلاثه ولو تحبوا تزودوا ضاعفوا المقادير

هنجيب ربع كيلو لحمه حمرا مفرومه ( 225 جم)
يبقى احنا هنحط تقريبا 70 جرام ليه ضاااني ( قطعه بحجم قبضة الايد ) ..
وهنخلطهم مع بعض في الكبه كويس لحد لما يبقوا نسيج واحد وهنلاقي ان لونهم بقى فاتح ..

ثاني سر بقى ودا اقتبسته من مطعم عبد الوهاب بعد تمحيص في الكفته بتاعته ابتسام جميل بس محدش يقوله
وهي انه بيضيف رز .. كنت باحسبها في الاول قطع دهن صغيره وبعدين لقيته رز
ودا اللي بيعوض الدهن الزياده ويخلي الكفته تنفش ويبقى حجمها حلو .. وفي نفس الوقت بيدي طراوه للكفته
نجيب معلقتين طعام رز وننقعهم في شوية ميه ..
وبعدين نصفيهم ونطحنهم في الكبه ضربه واحده بس
علشان مش عايزينه ناعم لان لو ناعم هيخلي الكفته مكتومه
عايزينه بس يتكسر ويبقى حتت صغيره تبان في نسيج اللحمه ..

بصله صغيره نفرمها بالسكينه ناعم علشان ما تنزلش ميتها ..

في طبق نخلط اللحمه مع البصله مع الرز المطحون ونضيف رشة خفيفه خالص قرفه مانكترش منها
ورشة بهارات او كبيبه صيني مطحونه
ونص معلقة شاي ملح وربع معلقة فلفل اسود .. بس كدا ..
ولو بتحبوا عليها بقدونس ممكن تضيفوا كمان

نصبعها على اسياخ لو مفيش يبقى نصبعها على قلم نظيف ومغسول .. بس الاسياخ افضل
ونرصها في صينية ..


علشان ما تنشفش
قبل ما ندخل الصينية نسخن الفرن كويس على درجة 200 من فوق وتحت لحد لما يسخن ويوصل للدرجه المطلوبه
بعدها ندخل الصينية في الفرن .. بدون ما نصيف سوايل ولا شئ لانها هتنزل سوايل وتستوي منها فيها وبعدين تتحمر
ودا شكلها في الفرن
 

مش بتاخد وقت .. ربع ساعه بالكتير هتكون استوت واتحمرت واول ما تتحمر نخرجها على طول

علشان نديها ريحة الفحم
بعد ما تستوي نحطها في حله ونحط فنجان في النص ونحط فيه الفحمه المولعه ونصب عليها الدهن اللي نزل من الكفته او حتة سمنة سايحه وسخنه
اول ما يدخن نغطي الحله بسرعه علشان تتشرب الكفته ريحة الفحم
 

وطبعا هتكون احلى واحلي لو اتشوت على الفحم بدل الفرن ..
نرصها في الاسياخ .. ونشويها يااما فوق شبكه على الفحم ...
او لو مفيش شبكه يبقى فيه خطوه مهمه لازم نعملها الاول وهي تشمييع الكفته
يعني اول ما نحطها على الفحم نلفها باستمرار علشان اللحمه تتماسك من جميع الجهات بنفس النسبه فتمسك كلها على السيخ وما تقعش
لان لو سيبناها على جهه واحده بدون تقليب الناحيه اللي ناحية الفحم هتتماسك اما اللي فوق هتبقى لسه لحمه طريه
والنتيجه ان الكفته بتفصل عن السيخ لان الجزء الاتقل اللي تحت بيشدها وتنزل على الفحم وتسيب السيخ ..

وهنا تتقدم بالف هنا وشفا ..
 


ملاحظه: الرز نقعته فتره مش اقل من نص ساعه في ميه دافيه
علشان يبوش ويستوي مع اللحمه ..

  

المصدر : http://forums.fatakat.com/thread2426016






3 التعليقات :

تسلمي على الوصفة الجميلة والمعلومات القيمة

إرسال تعليق