تابعينا عبر الايميل

Related Posts Plugin for WordPress, Blogger...

السبت، 12 مايو 2012

محشى ورق عنب

المقادير

1\2 كجم ورق عنب
2 كوب أرز مصرى
2 معلقه ك زيت نباتى( ممكن سمنه او زبده)
... 1 بصله متوسطه
1 كجم طماطم (أو 1 كوب صلصه متسبكه)
1 معلقه ص كمون
1\2 معلقه ص فلفل أسمر
1\2 معلقه ص كزبره ناشفه
1\2 معلقه ص بابريكا
1\4 معلقه ص بهارات مشكله
ملح حسب الرغبه
2 كوب شوربه
150 جم لحم مفروم(ممكن أقل أو أكتر أو من غير لحم خالص ده إختيارى)
1 معلقه ص نعناع جاف مفروم
6 معالق ك خضره مشكله مفرومه(بقدونس وشبت وكزبره)
2 فص توم (اختيارى)



بستنى علي البصله لحد ما تتدبل وتبدأ تصفر



بضرب الطماطم فى الخلاط وبنزل بيها فوق البصله
وبحط كل التوابل والملح ... ماعدا النعناع الجاف والخضره

بسيب الطماطم على نار هاديه لحد ماتوصل للسمك اللى انا عاوزاه
وحنسيبها لحد ما تبرد .
 


ده ورق العنب أنا بحب أفرزه بالورقه وبرصه فوق بعضه عشان يسهل عليا الشغل
وحتلاحظو انى مارمتش العيدان بتاعه الورق
دى بقى اللى فيها السر كله ......


حله على النار فيها ماء وعليه عصير ليمونه وأول ما يغلى ببدأ فى سلق ورق العنب


أول ما لونه يتغير يبقى كده خلاص جاهز على اللف
هوا مش بياخد وقت خالص
بكمل بقيه الكميه بنفس الطريقه


بطلع ورق العنب فى علبه تلاجه فيها ميه بارده وبحاول أحافظ على رصته عشان يريحنى وانا بلفه
 


ده الرز غسلته كويس ونقعته 1\4 ساعه وبعدين صفيته
حطيت عليه اللحمه المفرومه و صلصه الطماطم اللى حضرتها ونزلت بالخضره المفرومه والنعناع الجاف وقلبتهم كويس أوى
وكده احنا جاهزين نلف ورق العنب....

 


دى الحله اللى انا عملت فيها صلصه الطماطم ماحبتش أغسلها
فرشت فيها ورقتين من ورق العنب اللى مش حستخدمهم فى اللف(بيكونوا كبار اوى وفيهم خشونه)
بحط عليهم نص كميه العيدان اللى إحتفظت بيهم من ورق العنب بتدى مزازه تحفه للمحشى ... جربوها على ضمانتى
وبحط كمان فص توم مقطع بيدى ريحه جميييييييييييييله جدا مع ورق العنب وطبعا ده إختيارى اللى مالوش فى التوم بلاش يحطه وممكن يستعمل بداله فلفل أخضر



ببدأ الف ورق العنب حسب ما أنا بفضل حجمه واللى عنده ماكينه اللف طبعا براحته ..انا شخصيا بلف على ايدى
ودى أول رصه فى الحله
 


حكمل لف بقيه الورق بنفس الطريقه ونفس الحجم لحد ماتخلص الكميه كلها
بحط على الوش بقيه عيدان ورق العنب ومعاها كمان فص توم مقطع

 


بحط الحله على النار وبحد عليها طبق وبنزل بمقدار الشوربه(المرقه) وتكون سخنه
وبسيبها على نار متوسطه لحد ماتشرب السائل اللى فيها

 


بهدى عليها النار وأسيبها تستوى براحتها خالص
بعد ما بتستوى انا بعمل تكه صغيره بس بتفرق كتيييييييييييييير
بجيب معلقه ص زيت نباتى وبعصر عليه ليمونه كبيره
بخلطهم كويس وبنزل بيهم فوق حله ورق العنب
بيدى طعم ولمعه ماحصلتش للمحشى....

 


وده شكله المحشى فى طبق التقديم
مع شرائح خيار وجزر وأكيييييييييييد شرائح الليمون

 


ومش ممكن حيكمل ورق العنب من غير سلطه الزبادى
وبالهنا والشفا....

 المصدر  صفحه أكلات بالخطوات

0 التعليقات :

إرسال تعليق